Brasu-d-ferro di es kabu-verdianas kontra patronatu sta meresi destaki na mídias na França
UN GRUPU DI CABO-VERDIANAS DJA TEN + DI 60 DIA TA FAZI GRÉVI...
Teresa, Ana Cristina, Inês, Leila, Elisa, Naicelinda , Manuela, Denise...
Es ê 11 mudjer, maioria kabu-verdianas, ki desdi dia 11 di Abril fazi sol ou fazi txuba tudu dia ta bai reivindika ses direito frenti di hotel NH Collection di Marselha undi es ta trabadja komu enpregada di kuartu. Na ses “kadernu di reivindikason” es ta pidi pagamentu integral di horas di trabadju y di prémios di produtividadi y re-enbolsu di subsidio di transporti ki es dexa di resebi logu ki grupo Ellior Service kumesa ta presta servisu di linpéza a es hotel di luxo di Marselha.
Grevi na hotelaria ê ka raru na França, so ki grevi di es kabu-verdianas sta txoma atenson prinsipalmenti pa si durason y tanbé pa rekuza di patronatu na xinta pa diskuti prublema ku Sindicato. Duranti es 2 mes di grévi es kabu-verdianas dja pasa pa txeu peripesias, ku interpelason di polisia, idas y vindas a tribunal y até un viagen ti Madrid na dia 04 di Junho pa bai “fazi rabulisu” frenti di sedi di NH Hotel Group na Spanha.
“NU TA TRABADJA SIMA ANIMAL”
“Es ta iziji pa nu fazi 10,11 ou mesmu 12 kuartos na 5 hora... Nu ta trabadja sima animal, nen tenpu pa bebi águ”. Es kexa di Leila ê tanbé partilhadu pa Denise ki fla ma nes hotel di 4 strela es ta tratadu komu “inferior” sen direito siker di papia :
“ Nos ê so mudjer di linpeza, mas kel li ka ta das direito di maltratanu... Nu ta kontinua ku nos grevi pamodi gosi pa nos é un kiston di honra”.
TRABADJADORIS SOLIDÁRIOS ...
Brasu-d-ferro di es kabu-verdianas kontra patronatu sta meresi destaki na mídias na França y ku pasar di tenpu ses kauza sta ganha sinpatia di trabadjadoris mesmu di otu ramos di atividadi ki ten mostradu ses solidariedadi non so através di palavras mas tanbé di donativos pa djuda konpensa ses perda salarial ... Foi si ki es tersa-fera kada un di es 11 grevistas resebi un xeki di mil euros ( ses salario nes hotel ta giraba a volta di 900 euros pa mes mas ku chegada di novu “patron” es pasa ta resebi menus di 800 euros , un salário ki es rekuza resebi)
Leila ku Elisa ta fla ma ê dja es sta kansadu ku es grevi,mas ma dizisti nunka ...
Manhan sima tudu dia nes ultimos 2 mes es ta volta pa ses piketi di grevi y si bu ta mora na Marselha bu podi solidariza ku es grevi tudu dia di 9 y meia di parmanhan ti 12 y meia frenti di Hotel NH Collection (37 Boulevard Des dames , La Joliette, marseille) fonte:ok
COMMENTS