Prustituison infantil é un tristi rialidade na Cabo Verde...

Al ves ê propi familia ki ta “oferesi”  ses fidju pa turistas na Ilha di Sal

Un rialidadi ki  nen autoridadi  ka ta kré admiti  pa ka straga kel  imagem bunitu di Cabo Verde/Turismo Sustentavel ...Mas hora ki turista  riku ou ramediadu ta   kontra ku un kumunidadi pobri sima na  barrakas di Sal  ku Boavista   ê podi pruvoka un spésie di  tempural perfetu,  un mistura xpluzivu di droga ku alkuol ku sexo...Y horas ki  asuntu  ê sexo  kriansas ê primeru vítima ja ki prustituison ( inlkuindu turismo sexual ) ê legal na Cabo Verde desdi ki pratikanti ê maior d’idadi , mas txeu turistas ta prifiri ‘karni tenru”  pa  sasia ses apititi  sexual.

DENUNSIA  DI XPLORASON  SEXUAL DI KRIANSAS  NA  TERRA BOA...
Terra Boa ê un pekenu lokalidadi  ku di uns 200 habitanti situadu a 4 kms  di Espargos.  Si  populason empobresidu  inda nada ka ganha ku turismu, embora es ten sufridu txeu danus kolateral, prinsipalmenti  danus kauzadu pa es fenomenu  ki gosi  ta txomadu “turismo sexual” mas ki ê ka nada + nada menus di ki prustituison.  Di akordu ku un denunsia di un grupo di moradoris  ki da entrada na  Instituto Cabo-verdiano da Criança e do Adolescente (ICCA)  ten  mai ku pai na Terra Boa  ki ka ta dexa ses fidju  bai skola  pa podi fika na kaza ta spera  turistas . ..

...Pa alen di familias  ki ta oferesi ses fidju pa turiistas troku dinheru, denunsiantis ta fla inda ma ten ti organizasons  na stranjeru ki ta sirbi komu “ponte”  ou  ki  ta   “apadrinha” kriansas di Terra Boa pa prustituison . Na eskéma ki dja ten kant’anu  inda sta envolvidu  guias turistikus, taxistas y mesmu unidadis  hoteleru ki ka ta iziji idadi di kumpanhanti   pa subi kuartu.

Mas ê ka so na Sal ki es fenómeno di xplorason sexual sta straga vida di nos kriansas ku adolescentes. Ten relatos di kazas  y redi di prostituison infantil na S.Vicente, Boavista y Santiago  y  si ka tomadu medida  sertamenti ê ta ben  aumenta ku espanson  di  turismu.

PS:  Kazu di Terra Boa dja da entrada na Tribunal mas sertamenti  kulpa ta morri solteru ( Na CV inda ninhun turista ka bai kadeia pur xplorason sexual di kriansa) fonte:ondakriolo