USA: Apezar di ê ten so 6 anu ta vivi na Merka... Es kriola pega na mó 2 diploma di lisensiatura

Apezar di tudu obstakulos e ta fla ma  nunka ka dzisti.

A primera vista podi parsi fásil mas Lenira ta fla ma ultimos 4 anu foi “táfu”  sima kriolu ta fla  na Merka ...Ê ta lenbra di  kes noti  ki ê pasa  en klaru,  di kes hora ki e xinta e txora, di kes mumentu ki e duvida di si kabesa ...Apezar di tudu obstakulos e ta fla ma  nunka ka dzisti.

Lenira Monteiro gradua ku honra sabado pasadu na Rhode Island College ku dupla lisensiatura  na Psicologia y  na Estudo di  Iguadade de Género... Pa kenha ki flaba el ma era kuazi  imposivel  pa  alguén ki ta dumina inglez  aguenta 2 kursu intensivu di 4 anu  ê prova ka ku esforsu, dedikason y sakrifisio tudu ê posivel ...

Es joven kriola oji lisensiada  sai di Cabo Verde pa Merka ku 16 ano di idadi ... Inda ê bai Liceu na pekenu sidadi di Central Falls na Stadu  di Rhode Island  y  na  prinsipio inglês foi si primeru barrera....Komu studanti tantu di Liceu komu di universidadi ê fla ma ê sabia ma ê tinha “ki skala  otu montanha” ki  si kolegas ka tinha ki skála ... Ê pur isu ki enkuantu si kolegas di skóla   ta divirtiba ou ta durmiba  ê  pasa horas y horas na biblioteka  sempri ku  kel objetivu di bai + lonji.

Es vitória di Lenira Monteiro ta torna inda + gratifikanti pamodi enkuantu ê sta studaba tambe ê trabadja  na  ajénsia ki ta apoia familias  destruturadu   y kriansas ku prublemas di autismo...Foi  aliaz   através di es trabadju ki ê diskubri ma txeu mudjer kabu-verdiana na Merka ta sufri ku  violénsia doméstika, un “prublema sosial y politico” ki ê fla ma ta priokupal....Na futuro ê kre djuda  mudjer  kabu-verdianu na Merka kombsti   es prublema y  també un dia  bai da  si kontributu pa igualdadi di género na Cabo Verde.

Na kulégio Lenira  trabadja inda 3 anu komu asistenti di biblioteka na traduzi dokumentos y na introduzi studantes na  studu  di Cabo Verde. ..Ê foi ativa na Asosiason  cabo-verdina di Rhode Island College y pa si konkistas akadémicas ê foi honrada ku premio  di  “Gender and Women’s Studies Award “   y e ganha un bolsa pa mestradu na Smith College , na  Northampton, na estado di  Massachusetts.

Lenira ta kumesa  si mestradu na estudos sosiais  nes veron ki sta txiga ma ê fla ma  enkuantu ê ta studa ê  ta kontinua ta trabadja  sempri ligadu a kumunidadi  y  sempri ta advoga pa direito di mudjer. Fonte:ok
Kantu “like” ki ê meresi?