Es kabu-verdiano na Portugal dja tinha 26 anu sen kontakta ku si mai na Cabo Verde

Sassá finalmenti papia ku mamai joana ...

Es papia atraves di Skype grasas a si amiga portugueza Joana Paula ki sabendu di si stória djobi mai di Sassa ti atxa na Txon Bon di Mangui na ilha di Santiago kuandu ê stevi di féria na Cabo Verde (direito na foto).

Primeru konbersu di Sassa ku si mai foi un mumentu espesial , un mumentu di alegria y di imuson, mas també di xóki y di surpreza pamodi ninhun d’es ka sta speraba ( Na prinsipio mamai Joana nen papia ka konsigi). Pa Sassá foi un mumentu ki ka ten xplikason mas ki na si vida fazi grandi diferénsa.

DOR DI SEPARASON...
Sassá (Cândido Sanches ê si nomi di baptismu) Sassá “rankadu” di si mai ku 9 anu di idadi kuandu ê lebadu Portugal pa bai vivi ku si pai. Pur algun motivu ki Sassa ta konsidera un fadja si novu familia na Portugal nunka ka pirmitil kontaktu ku si mai. Ê kria sempri ku un “vaziu” na kurason, sima ki algun kuza sta faltaba el sima ê fla nun muzika ki e fazi justamenti pa si mai Joana .
Foi aliaz es muzika ki “emusiona” portuguéza Joana Paula y ki lebal a djobi “mamai Joana” ti atxa na Tarrafal pa mostral es tal video( Ka foi fasil diskubri mai di Sassá pamodi ê ka sabia si paraderu paraderu mas dipos di uns 2 semana di buska Joana Paula finalmenti diskubri Joana). Foi enton ki mai ku fidju papia pa primeru bes dipos di 26 anu sen kontaktu.

ATE BRÉVI SE DEUS QUISER ...
Sassá ki gosi teni 35 anu inda ka da si mai kel abrasu pertadu mas ê prumeti vizital na Txon Bom logu ki ê regulariza si dokumentu. Ê kré rekupera “tempu perdido” , mas també ê kré agradesi si mai pa enkumenda ki ê manda-l ku Joana Paula ( leti en pó ku bolaxa ki ê fla ma era kumida preferidu di Sassa kuandu era minino) fonte:ok