Luz k ta guiam

Nhaguenti... sai de bu forma quadrado e bu odja tamanho des mundo k bu teni bu dos pé fincadu nel!

Na meio de trebal sukuro, ta fladu ma cafú ka faze efeito. Na meio do nada, ta fladu ma ninguem ka ta aguenta canela, riba d'agu mar ta boia sem sperança ta fladu ma so ta safa kenha k tem bom braço pa dá brazada pa txiga terra.

Se nu fitxadu odju, nu dexadu na modju pa nos corpo flutua táki nu contra ku lua... maioria de nós ta odja um realidade diferente criadu pa nós...
Ayam, um realidade colorido pintadu na tela, ku nomi de nós tudo, ku storias bonitos, k um mó lebi cima pena, dezenha riba nuvem de ceu e pide pa tudo strela limiá, pa sol guarda e pa txuba bençuá...
Kel storia bonito li é storia de mi ku bo. Storia de um sonho rosado k tenta cobrido ku medo, ku magoa e ku falta de confiança na nós. ..

Kel storia li munti ta txoma de distinu. Mi nta txoma de sentença de um criador k ka ta dorme na forma.
Es comberso li é pa bo k ta labanta madrugada tudo dia pa busca um vida midjor. Kel comberso li é pa tudo kenha k odja disgraçado ta ri de si rosto e de si sonho...
Kel comberso li é pa mi é  pa bo, pa nós amigo e nós vizinho, es comberso li é  pa nos tudo.


Nhaguenti... sai de bu forma quadrado e bu odja tamanho des mundo k bu teni bu dos pé fincadu nel!
Sai de es storia de tristeza e de magoa k ka ta lebabu a lugar nenhum.
Pára! Djobi mod k strela sta bonito na aitura. Chinte brisa de mar ta correu na rosto cima abraço de kenha k kria mundo... chinte abraço de um Nhós Des k sabi de bu dor, sabi de bu luta.
Sai de casca! Bati mo na petu bu enfrenta bu medo.

Racatxa bu honra kenha k pou na mundo! Nha mano... bu ka é acidente. Bu ka plano mal fetu! Bo é obra d'arte na museu de vida.
Sigui bu coraçom. Centra na luz k ta guiabu na meio de fucu fucu de boca noti. Fitxa coragi bu racatxa cima mil k consigui txiga na und kes kre mas tambe k sufri...
Es guerra li é ka pa fraco. Es guerra li é pa nós k ka podedu kol.

Es guerra li é pa mi ku bo.
Obi nha comberso! Ochi nha texto é ka pa Djuána Tabari, nem pa kel miná de fora...
Hochi nha comberso é pa bo. Sukutam!

Dicla Gonçalves