Konxi es kriola di Brockton ki “troka” Merka pa Áfrika

Michelle Andrade leba kriatividadi pa Nigéria

Kriatividadi y inovason enprezarial.
Inovason podi ser difinidu komu xplorason ku susesu di novus ideias…Y ideias ê kuza ki ta fa falta a Michelle Andrade, es fidju di kabu-verdianu nas-sidu na Merka ki desdi anu pasadu sta uza si intilijensia, si talentu y abilidadi pa diriji ku susesu un di kes + inovador “co-work center” di Nigeria ( Workstation)

“Workstation “ ê un lokal di trabadju ( skritórios).
Nu ta xplika : Sima na tudu sidadis di mundo també na Lagos na Nigéria ta sai karu luga un espasu pa kumesa un negosio ou pa munta un skritório… Ideia di Michelle y di + 2 otus jovens nigerianus ki studa na Merka foi oferesi un muderno lokal di trabadju pa tudu kenha ki kré luga un skritorio pa un dia, un semana, un mes ou un anu a un presu a-sesivel.

Sede di “Workstatin” sta na Victoria Island, na plenu sentru finanseiru di Lagos. Dja ten un anu ki e sta abertu 7 dia pur semana pa oferesi ses klientes tudu kondison pa trabadja ( skritorios privadu, high Speed Internet, fotokopiadoras dijital, etc, etc).

Michelle Andrade ê diretora ezekutiva di es “stason di trabadju”. E el ki ta jiri y ki ta kordena tudu operasons y ki implementa tudu ideias pa midjora es servisu ki ê kré odja ta espandi pa out paizes di África ( komu des-sendenti di afrikanos Michelle fla ma ê sta prufundamenti enpenhadu na apoia jovens emprendedoris afrikanus na djobi di novos formas di impulsiona dizenvolvimentu di Afrika. Pa alen di espasu pa trabadja “Workstation” també ta treina jovens pa mundo emprezarial y es ta presta tudu apoio pa kenha ki kré kumesa si negosia y spaka di es tendensiozi siklu di dizenpregu y di mizéria…Y ku ses “Digital Member Network” pesoas interesadus na invisti na Afrika podi “inter-aji” virtualmenti.

Michelle Andrade é lisensiada en Admnistrason di Negosios pa Universidadi di Boston. Antis di ê ruma pa Nigeria ê trabadja na area di kontabilidadi komu analista na kompanhias na Boston y Washington DC. fonte:ok