Jailson, um exemplo di Bom Caboverdiano...

Jailson, um jovem caboverdiano ki ta vive na Merca, y ki sempre faze possivel pa ajuda kenha ki mais precisa.

Si nu odja pa nos mundo criolo, certamente nu ta odja alguns jovens di distaque. Hoje nu resolve fala di Jailson, um criolo orgulhoso di ser Caboverdiano, y ki ta distaca pa kuzas positivo. Ta fladu ma alguem ka podi ser homenagiadu vivo, pamodi inda ka sabedu kuze di mal ke podi faze. Mas nos nu ta pensa diferente, nes mundo tudu alguem sta sujeito a era, mas nu debi da importancia y aplaudi kenha ki sa faze dreto, pa motiva a continua ta faze y pa inspira otus a faze cada bes mais...

Hoje si nu sa fala di solidariede, di ativismo, di pega faze, di mobiliza, di menus papia y mais asson, certamenti nu tem ki pensa na Jailson, claro ki existe mais nome, mas hoje destaque é pa es jovem ki nanci na Saltos,  hoje é ta vive na Merca mas é ka skece di Cabo Verde. Dja nu perdi conta di mobilizasons solidaria ki es jovem dja faze pa consigue meios pa ajuda pessoas na Cabo Verde, el é um colaborador ativo di Safende Tudo Hora, um organizason di valor na nos tera, ki tem stadu ta faze tudu ki sta na ses alcansi pa ajuda pessoas a tem um vida midjor.

Voltandu pa Jailson, um rapaz muito certo na kuzas ke ta faze, sempre transparente y claro na si comunicason, y sempre ke teni um causa pa apoia é ta traze dados di tudu publicamente pa ki ka fika nenhum duvida. Sima nu sabi tem txeu pessoas ki ta faze desvio di ajudas ki ta dadu, mas ka é caso di nos Personalidade di hoje, ki para alem di solidariedade é tem dom di comedia, talves inda é ka descubre, mas nu ta nota es ladu comico nel, ki sempre ta faze pessoas ri ku si brincaderas.

Nu ta deseja sempre kuzas bom pa Jailson, ki é kontinua ta fazi u ke ta faze, y nu ta apela a tudu jovens a sigue bons exemplos, y kem sabi es ta bem sta li nes espaço ta ser aplaudido pa kuzas bom kes ta faze.

Si bu ta admira criolos di bons assons, dexa mural pa es jovem y partilha.