Hoje cenário é mas grande e horizonte é mas além, e djuntu nu podi bai cada vez mas longe
"Mensagem de incentivo a tudu Cabo-verdianos pa bai apoia TUBARÕES AZUIS
Hoje nu tem um Seleçon capaz de trazi alegria pa es povo que merece, pa es povo que tcheu dja sufri desde inicio de si historia, pa es pais que natureza foi poco generosa kual, que tcheu bes ses fidjus xinti obrigado a bai pa longe a procura de um vida midjor...
Es Seleçon é resultado de tudo antes falado, resultado de kes que fica e de kes que bai mas que nunca esquece de ses origem, por isso hoje fidjus de es terra piquinote mas de es grande naçon Cabo-verdiana, que ta abrange desde nos 10 ilhas até diáspora, ta bem de longe e de perto ku tudo amor e orgulho pa leba nos bandera na peto... Nu da credito a es Seleçon que meste de nos hoje mas que nunca, nu das gosto e privilegio de uni kes 10 ilhas na um só e obi Hino Nacional na um so voz...Ka nu permite que maus momentos poi em causa kel paixon que nu ta xinti pa kel terra que originanu. Nu segui exemplo de um passado recente, tipo 13 anos atrás, quando Seleçon era ainda modesta, ku jugadores moda Zé Piguita, Cafú, Lito entre otus, jugadores que da tudo que es tinha cada vez kes poi camisola de Seleçon, mesmo que na altura Seleçon ka tinha grandes aspiraçons tipo classifica pa um Mundial, nem se quer disputa fase final de um CAN, e Estádio da Varzea poco sabia cuzé que era vitória, mas sempre cheio, adversário ta xintiba cuzé que era juga na Cabo Verde, tcheu bes ta xintiba intimidado propi, nem equipa de arbitragem ka ta escapaba ... Era batukada desde antes de inicio de jogo, publico ta vibraba durante 90 min, ka sabia sta xintado, era cançons de motivaçon pa nos jugadores, assobios pa contesta maus decisons de Arbitro, e até mesmo insultos...Ka tem explicaçon possivel pa descreve cuzé que era staba dento de Estádio da Varzea na um jogo de Seleçon, mas tudo kela era independentemente de resultados...
Hoje cenário é mas grande e horizonte é mas além, e djuntu nu podi bai cada vez mas longe... Nu leba nos batucada, nu leba kel alegria de povo Cabo-verdiano pa Estádio Nacional, nu bai apoia kes ké de nos, nu lebas kes boas vibras e energias positiva, nu mostra nos jugadores que bem de tudo canto de mundo pa representa Cabo Verde kal ké verdadero significado de Morabeza, nu fazes xinti na casa e nu fazes xinti ma nu sta kuas... Ka tem nada mas sabi que obi silencio de nos ilha a ser rompido pa Cântico da Liberdade, desde Monte Vaca ti kel ultimo ilha de Cabo Verde...FORÇA TUBARÕES AZUIS - FORÇA TUBARÕES AZUIS"
Por Emanuel Cardoso
COMMENTS