Si nomi ê Bampumim Teixeira, 30 anos di idade.
Teixeira foi es segunda-fera akuzadu di 2 krimis di homicidio pa morti di 2 médicos na decimo-primeru andar di un kondominio di luxo na Boston. Krimis kontisi sexta-feira di noti y vitimas ê Dr. Richard Field , 49 anos di iadde, y si noiva Lina Bolanos, 38 anos di idade (direito na foto) Es tudo 2 morri degoladu y vilencia di krimi dexa Boston spantadu.
Kazu inda ka sta klaru pamodi Teixeira ka konfesa krimi y si advogado dja da entrada na Tribunal a un declarason di inocência, embora policia ta fla ma es enkontral dentu di apartamento di vitimas ( un kondominio di kuazi 2 milhons di dolares na Sul di Boston). Embora ka sta espesificadu na autos di acuzason roubo seria motivo di krimi pamodi di acordu ku policia també es atxa na sena di krimi un moxila xeio di joias pa alen di un pistola di txunbu y un faka.
Policia desloca a rezidencia di es cazal es sexta-fera pur volta di 8 y meia di noti pamodi es resebi xamada di un amigo di es medico ta fla ma staba en kursu un tiroteio nes apartamento ( aparentimenti es medico manda un mensagen pa es amigo ta pidi ajuda). Ku xavi ki es encontra na txon policia abri porta y la dentu pa alen di korpu mortu y ensaguentadu di vitimas ( ku mon marradu) es fla ma es atxa un individuo ki + tardi ben identificadu komu Bampumin Teixeira, sidadon di Africa Ocidental rezidenti legal na Merka.
Na altura Teixeira foi baliadu pa policia na brasu, na barriga y na perna, mas ê ka sta korri perigo di vida ( embora ê kontinua na hospital undi ê bai ledu acuzasons kontra el sima bu podi odja na foto na kumentario)
Primeru policia fla ma es discarrega ses arma kontra el pamodi el ê ki dispara primeru mas dispos es ben disminti pa fla ma Teixeira ka dispara ninhun tiro.
Tambe es disminti ma es joven konxeba vitimas sima foi ventiladu na alguns jornal, jornal ki tambe sta pergunta modi ê ki alguen podi entra nun komlpexo di luxo ku tudu aparatu di seguransa ( ten kamara ti na elevador). Policia ka konfirma mas pa certos jornal ta fla Teixeira trabadja na pasadu komu guarda di seguransa nes kondominio.
Tambe es disvulga si kadastru policial ki ta inclui 2 tentativa di rouba bancos na Boston ( embora sen armas) ki kustal 9 mes na kadeia.
Si ultimo rezidencia xonxidu foi na Chelsea, na estado di Massachusstts. Si ex-namorada ta fla ma el ê un un bon pessoa, ki ka ta fazi mal a ninguen.
Foi tambe si ex-nomorada ki fla ma ê nasi na Guine-bissau mas ma ê kria ku un tia na Cabo Verde. Di Cabo Verde ê imigra pa Merka kuandu y tinha poku + di 20 anos di idade.
Bon pessoa ou nau Teixeira ten ki ben respondi pa 2 krimis di homicidio. Ê debi obidu na Tribunal na dia 8 di Junho. Pra ja e ta kontinua prezu sen posibilidadi di fiansa. Si ê for konsideradu kulpadu ê ta korri risku di pasa restu di si vida na kadeia. Fonfe:ok
COMMENTS