Criança di 12 ano enforka kabesa na Santa Catarina...

Kazu di suicídio infanto/juvenil sta aumenta na Cabo Verde

Si nome ê Angelo.
Ê ta moraba ku si familia na Cabeça Carrera, na interior di ilha di Santiago y era aluno di setimo ano.
Angelo foi enkontradu mortu es kuarta-fera di tardi penduradu nun korda na kintal di caza di un ses vizinho. Ka sabedu pamodi ki es kriansa dicidi kaba ku si vida.
Morte di Angelo e segundo kazu di suicidio ki sta kontici na Santa Catarina na menus di un semana. Sexta-feira pasadu foi Sandrina, un rapariguinha di 18 anos, ki mata kabesa na Tchada Lem, a pokus kilometros di distancia.

Mas e ka so na Santa Catarina.
Semana sin semana nau ta obidu noticia di un criansa, di un joven ou di un adolescente ki mata kabesa na na Praia, na S.Vicente, na Fogo ou na Sal...

Suicidio ê un di kes principal kauza di morti violentu na Cabo Verde ( e sta entre kes 10 principal kuuza di morte na geral)

Tudo d’anu uns 40 cabo-verdianos (principalmenti rapazis) ta termina ses vida di es forma trágico.
Mas es flagelu sta atingi també nos kriansas ki aparentimenti ka ten mutu motivo pa dizisti di vivi ... Mas nau ...

Kuzas ki pa adultos aparentimenti ka ten mutu importancia sima gozu di colegas, konflitu na caza, instabilidadi familiar, frakasu escolar ou até fin di un namoro (rial ou imaginario) podi desenkadeia nun joven ou nun adolescente un depreson profundo acompanhadu di es sentimentu terrivel di kaba ku vida. Ten kazu també di jovens y adolescentes ki ta mata kabesa pamodi es sofri un trauma profundo derivadu di abuzu sexual ou di violencia familiar.

E sobre tudu es prublemas ki sociedadi cabo-verdiana ten ki djunta pa pensa .... pamodi ê ka facil privini suicidios....
Pessoas ki ten intenson di termina ku vida geralmenti ta da alguns sinal mas nem sempri familia y sociedadi ka ta sta preparadu pa “entendi” es sinal ....Na maior parti di cazus es ta refugia na solidon y silencio pa es ê un gritu di dor ki infelizmenti ka ta obidu. fonte:ok