Nha Paulina, 78 anos, ê un cidadon informada y politicamente engajada. Detentora di dupla nacionalidade (cabo-verdianu y merkanu)
Paulina Monteiro, esquerdo na foto, na tudu eleison na Merka ta vota pa kandidatu di partido democrata mas pa eleison prezidencial di 8 di Novembro ê sta un bokadinhu + ativa na “kampanha” pamodi ê fla ma e teni medu di odja Donald Trump na puder.
Si kandidatu ê Hillary Clinton ki ê fla ma ten mutu + experiencia y kapacidadi pa guverna Merka..... Y foi ku atenson ki es kinta-fera di noti ê sigui disurso di es kandidata ki na Convenson di Partido Democrata aceita oficialmente si nomiason komu primeru mudjer ki sta konkorri pa kargu + importante ki ten na Merka.
Nha Paulina, 78 anos, ê un cidadon informada y politicamente engajada. Detentora di dupla nacionalidade (cabo-verdianu y merkanu) es kriola di gema nascidu na Mindelo y kriadu na Santa Catarina, ilha di Santiago, ka ta brinka ku si voto tantu pa eleisons na Merka como pa eleisons na Cabo Verde ( ê tambe MPD ferrenha).
TRANPADJADA...
Di forma ki es eleison prezidencial na Merka e pa Nha Paulina un kiston pessoal : Ê ka kre odja Trump nen pintadu na papel, Trump ki ê fla ma si pur azar ganha eleison ê pa Deus djuda nos imigranti, principalmente kes ki inda ka teni documento y ki Trump fla ma simplismenti ê ta manda deporta.
Mas pa Nha Paulina ê ka so ku deportason ki Trump sta amiasa imigranti : Kandidatu republicano també dja fla ma si ê for eleito prezidenti ê ta kába ku “cidadania por nascimento” ( quer dizer ma fidjus di imigrantis ki naci na Merka ta dexa automáticamenti di ser consideradu cidadon merkanu) y ma ê ta revoga kel medida ezecutiva di prezidenti Obama ki ta impidi deportason di jovens ki entra Merka inda mininu. ... Y pa impidi “indokumentadus” di trabadja Trump dja prumeti fazi un fiscalizason cerrada kontra empregadoris ki ta paga “baxu meza”.
Trump també dja anuncia ma e ta aumenta “rikizitus” y presu di visto pa entra Merka enkuantu kes imigrantis ki sta na “States” si es kré riuni ku familia ki fika pa tras unico suluson e volta pa terra.
Pa Nha Paulina es politicas di Trump ê un verdaderu “tranpadjada”
PAMODI HILLARY CLINTON ?
Nha Paulina, ki fla ma dipos di un pretu ê ta gostaba di odja un mudjer na Casa Branca, Nha Paulina fla ma Hillary ê ka un kandidata perfeita mas ma ê kel ki ta da + garantia.
Es kinta-fera ê fika particularmente kontenti kuandu ê odja na TV es kandidata ta fla ma si ê for eleita ma ê ta kontinua trabadju di Barack Obama na sentidu di reforma Servisu di Imigrason y di tenta legaliza tudu kes 11 milhons di imigrantis ki ta vivi na Merka sen documento.
També ê fla ma ê fika kontenti kuandu Hillary anuncia ma ê ta ben kria un sistema undi ki tudu jovens podi bai colégio sen paga . Pa Nha Paulina es medida podi ben benefecia txeu jovens kriolu na Merka ki mai ku pai ka ten meios pa paga studu.
Y dipos...
Y dipos Nha Paulina ta fla ma Hillary Clinton pelo menus dja passa 2 dia na Cabo Verde ki é vizita na 2009 , enkuantu Trump nen na mapa ka ta konsigui localiza nos arquipélago.
Mas kriola ê tambe un mudjer realista y “preparada” pa tudu....Ê sabi ma nes eleison di Novembro na Merka kualker kandidatu podi ganha. Ê por isso ki ê ta da pidi tudu imigrantis ki podi pa meti papel pa cidadania merkanu. Just in case... fonte:ok
COMMENTS