França: Rapazinho de origem Caboverdiano atxadu morto

Ludovic Dylan staba perdedu desde dia de tragédia ki kontisi semana passado na Nice, França. Familia recebi hoje noticia ma korpu de Ludovic identificado entre pessoas ki sta morto.

Ludovic Dylan de 15 anu é segundo pessoa de origem caboverdiano ki perde vida nes massacre, provocado pa um individuo ki  atropela quinta fera, dia 14 de Julho,  ku um kamion, varios pessoas na Promenade des Anglais, kantu staba ta dadu foguete (fogo-de-artifício) pa celebra dia de França.

Depois des ataque na Nice, confirmado morte de Ludivine Gomes (Ludi) de 25 anu ki é irma de Ludovic. Ludovic Dylan staba desaparecido desde quinta fera.  Ses pai ki é de Tarrafal, ilha de Santiago, e ses mae ki é de Martinique, es tambe es fika ferido. Pai konta ma es staba tudu djuntu ta sisti foguete kantu kamion da nes. Ludivine inda fazedu reanimason, mas é morre na local ki é staba kantu kamion da nel. Pai fla, ma na momento de atropelamento, si fidju Ludovic salta e nunka mas es ka odjal.

Na cidade de Nice sta pendurado cartazes ku fotografias de pessoas ki ka odjadu mas, desde quinta fera.  Txeu familias ki ka recebi noticia de ses familiares ki staba desaparecidos, inda es fika ta spera pa ser identificado mortos, mas esperança é ma es ta recebi noticia ma atxadu ses familiares ku vida, sima kontisi na alguns kazus.
Infelizmente, es pai caboverdiano ki dja sta na sufri pamodi morte de si filha Ludi, é recebi hoje novamente noticia triste ma si fidju Ludovic atxadu morto.

Dja confirmado mas de 80 mortos e inda sta pessoas na hospital em estado considerado crítico. Condutor de kamion de nome Mohamed Lahouaiej Bouhlel, morre durante confronto ku polícia e dja pegadu sete alguen ki é suspeito de sta envolvido nes massacre .

Familia de Ludivine ku Ludovic, dja komunika ma brevemente es ta anuncia ki dia ki ta fazedu funeral. fonte:dypk