Dezabafo: "Policia Frontera, aria da policia nacional menus valorizadu na Cabo Verde"

Guvernu ka ten ruspetu pa kez policias la, ki devia ten Un salariu mas dretu pes ka Kai na korupson. Policia Frontera devia dadu mas valor

Un seguidor de Dexam Sabi manda es mensagem: "Nsa bem fala di aria di policia ki Ta ganha mas Poku na Kabu Verdi, Policia Frontera.

E Policia ki na mundu interu Ta pagadu mas bem ki tudu kez otus Policias. E na frontera Ki Ta kontroladu entrada i saida nao so di pessoas, i kuzas ki entra i sai di pais bem komu kuzas ilegal ki podi sta kamufladu, i produtus ilisitu sima arma, droga I otus.

Na mundu interu e policia ki Ta pagadu mas bem ki tudu kez otus, mas na Kabu Verdi e ao kontrariu, e policia ki sa ganha mas poku. Tudu kez otus arias di policia ten subisidius asima di ses salariu.

Policia fiscal, ten Un bolu ki alfadegas Ta das, policia maritimo tambe tem di ses, Piquete, BiC BAC tem, ainda ku ora extra. kez di skuadra, transitu ten ses oras extra, mas frontera gosi nada ka tem. Es Ta flaba ma ASA Ta daba algun kuza mas Nunka txiga Bolsu di Agentis di Frontera, koitadus Ta trabadja afinkadu na Kel Kau Apenas Kel salariu normal. Frontera ten ki pagadu bem pa diminui korupson, pa motiva mas kez agentis la. E aria di Policia ki Ta valorizadu. Alen di fazi Kontrolu di dukumentus di viagi, entrada I saida di pessoas, Es Ta fazeba kontrolu di bagagens na raiu-X, detetor metal, ki gosi e siguransa privadu ki sta fazel I servisu sa pagadu gossi. Ki falta di respeitu pa Policia frontera, nka sabi undi sta Ministeriu Di Administrason Interna, Direson Nacional di Polisia, Direson di emigrason I frontera, ka ten nun konsiderason pa trabadju ki Polisia Di frontera Ta fazi. TACV Ta benefisia Txeu ku trabadju kez Polisia la, mas nun diskontu Es ka ten na kompra Di bilheti.

Voo Di merca sta Di pe grasas a trabadju Di kez Policia la. Mas Nunka Es da nun benefisiu pa kez agentis, Xefis debi tem, mas agentis nada ka ten. Nka sabi guvernu ka ten ruspetu pa kez policias la, ki devia ten Un salariu mas dretu pes ka Kai na korupson. Policia Frontera devia dadu mas valor, Nta spera ku Kel novu guvernu es Ta bem valorizadu mas txeu."
Anonimatu