Sr. Governu, ka Nhu pensa ma N sta bem kritika nós polítika, julga, ponta dedu ou pápia so pa fika bunitu. Nhu sabi kuzé ki N kre? N kre pa NU DA MO.
“Sr. Governu,
N sta xintadu ta djobi pa tekladu y el ta djobi pa mi. Kel dúvida sim ta uza palavras karu, sima lei di omi ta manda, oras ki nu ta dirigi pa um xéfi di stadu. Dja N konpu nha ókulos um mar di béz, sem nunka é ter saidu di lugar. Sta txuba y grau negativu la fora. Nha mãi ta fla-m sempri pam volta pa Kabu Verdi, pa N ka dexa friu maltratam, mas oras kim sta la, é ka ta kre muntu pa N sai di kaza. Kusas di mãi ku sé fidju. N ta intende-l. N ta intende-l tantu, Sr. Governu, ki N atxa ma N debi skrebi um karta pa Nhô. Nhu sabi um kusa? N sta dexa-m fala ku nha alma y letras umildi pamodi N atxa ma tudu nha povu tanbé meresi lé nha karta.
Sr. Governu, ka Nhu pensa ma N sta bem kritika nós polítika, julga, ponta dedu ou pápia so pa fika bunitu. Nhu sabi kuzé ki N kre? N kre pa NU DA MO. Só keli. Nós Kabu Verdi sta bai na se ondas y povu sta riba mar, kada um ta djobi sé barkinhu pa ka afunda. Mas nós sempri nu luta djuntu. Um amigu português di-meu fla-m ma nunka é odja povu mas patriota na se vida di ki kabu-verdianu. É si ki N kre pa nha irmã fladu na futuru.
Sr. Governu, Nhu diskulpam, mas N kre luta pa nhas meninus. És ka meresi um infânsia frontadu. És tem direitu a kori pineu, aproveita sukuru pa brinka sukundida y splora ses zona, di um ponta pa kelotu. N kre pa nha mãi bai trabadju diskansadu y pa nha irmã spera-l txiga kaza, sem petu pertadu; ku se idadi, nha priukupason era tem bom nota na prova pa profesora fika kontenti ku mi y pentia nha boneka mas bonitu ki di nhas amigas. N kre pa e kria ku orgulhu di ser fidju das ilhas, sima mi.
Sr. Governu, Amílcar Cabral, Cesária Évora, Germano Almeida y nós Tubaron Azul é izemplu di alguns nomi ki luta ku pé finkadu pa poi nos Kabu Verdi konxedu na mundu. Fransés fla-m ma el é gosta txeu di obi múzika “Sodadi” y inglês mostra-m surizu largu kantu N fla-l mi é di undi, pamodi me odja jogu ki Kabu Verdi ganha Portugal. N xinti di grandi pamodi nós é ka so kaminhu di pasaji di avion ku barku, nu sta na boka mundo. É simé, munti strangeru sta kuriozu pa konxi kel téra ki ta txomadu morabeza, sima Sara Tavares kanta, ou “A Ilha Fantástica”, di Germano Almeida. Pa N konfesa? N teni medu, Sr. Governu, es podi bai y fika disepisionadu. Nau ku nós beleza natural, ki ka ta nem diskutidu, mas ku violênsia. É ki nós téra é pikinoti pa brinka de “Cidade de Deus”.
Sr. Governu, undi Nhô?
Ka nhu dizisti di nós. N teni tantu stória y medu pa partilha ku Nhô y N tem serteza ma N ka sta mi só.
Um dia, N staba na paraji di otokaru, txiga um senhora dja di idadi, ki sta emigradu munti anu, é fla-m: “nha fidju, ami N tem gana bai pasa nha bedjisa na nha téra, N tem nha kaza la kim fazi dipôs kim viaja, mas N sta ku medu.” N lamenta djuntu ku el. Poku digno, si mi jovem, ki ta fladu futuru di um país, N fika so ta lamenta, soluson ta dexa di izisti. Intom, N kre txiga na Nhô, Sr. Governu, pa nu djunta kabesa y mo. Afinal, nos Kabu Verdi é di speransa.
Sr Governu, N pensa ma, se kalhar, dja sta na ora di sensibiliza mãi ku pai. És mesti ajuda. Sta faltaz prendi lida ku situason. Nu mesti organiza palestra, enkontru entri pais ki ses fidju sta na mundu di krimi y pais ki dja intera ses meninu. Djunta moradores di um zona y polísia y poz troka ideia.
Nu mesti sensibiliza nós Povu.
Nhu trabadja em parseria ku nós meiu di komunikason, pa fazi reportagens, matérias, si ka intendedu, nu ta dizenha. Tem oras ki N ta atxa ma nós meiu di komunikason sta ku medu pamodi es ta mostranu só momentu dipos di dizastri. Nu ka konxi txeu stória di “nos thug”. N entra um bez na um “braku” di ses, era apenaz um grupu di minis ki sta brinka di bandidu y ka tem konsiderason pa vida di otus alguém. Nu mesti trabadja ses menti, ka nu baza só pó nau. Nha mãi ta flaba mi ma é ka ta sota meninu txeu pamodi korpu ta karixa y toma pó ta fika só kel dor di momentu, medu ta dizaparesi. Oje N sabi ma é verdadi. Ka nu djobi undi ki sta kulpa nau, nu aseita ma nos tudu é kulpadu. Nu djunta pa nu ka kontinua ta alarga nos simitério ku nosenti, nobus y talentos ki ka sploradu.
Sr. Governu, N kre fitxa odju, poi mó na nha petu y xinti ma kada palavra ki sta skritu na nha Hino é verdadi, pam podi pasal pa nha irmã ku forsa y fazel xinti ma é podi kunfia na mi, na sé kaza, na sé País. by Vandrea Monteiro. fonte:dypk
COMMENTS