Ivan ê un di kes centenas ou milhares di fidju di cabo-verdianos nascidos na “Tuga” ki ta vivi sen “identidade”.
Ivan ten 8 anu, ê fidju + pikinoti di Ana Cardoso imigranti cabo-verdiana di 43 anu ki dja ten 33 ta vivi na Portugal.
Ivan ê un di kes centenas ou milhares di fidju di cabo-verdianos nascidos na “Tuga” ki ta vivi sen “identidade”. Postu di ladu. Excluidos di sociedade. Pa si mai kel li ê un situason kruel, dezumanu. Injusto. Pa Ana Cardoso tudu crianças ki naci na Portugal debia ten nacionalidade portuguez. Automáticamente.
APÁTRIDAS
Ten cazu di crianças ki nen ka ten registo di nascimento. Ê sima ki es ka existe. Es ka ten Patria. Txeu centros di saude ou estabelecimento di ensino ka ta kre recebez pamodi es ka ten documentason. Ou numero di Segurança Social.
Ana Cardoso ten 4 fidju tudu nascidos na Portugal ( era 5 mas un fémia morri na un acidente di carro). Ê fla ma si fidjus kria revoltadus , “un sentimento di revolta ki al vez pessoas ka ta entendi”. Sima Ruben por exemplo. Ruben ê si fidju matxu di 20 anu. Si sonho era ser jugador di futebol mas na tudo clubes ki ê bati na porta es pidil carton di cidadon portuguez. Ruben so tinha cédula di nascimento. Hoje Ruben e “cidadon” mas ti inda e sta revoltadu. Sen trabadju y sen un profison, ê ta kré kulpa si mai ku pai pa es situason. Mas nau. Ana ta fla ma entri papel y sobrevivéncia di si fidjus sempri ê opta pa sobrevivencia. Entre nacionalidade y dexa si fidjus passa fomi ê fla ma ê opta pa da fidjus kumida. Ê si ki ê kria Nicole, ki hoje teni 17 anu. Desejo di Nicole era entra na un curso di restaurason na Lisboa, mas ê ka aceitadu pamodi ê ten so passaporte cabo-verdiano. Si fidju-fémia + grandi ten 26 anu, ê mai di 2 fidju. Tambe nunca ê ka konsigui nacionalidade.
200 EUROS
Ê ki pa “requizita” di nacionalidade ta kusta 200 euros, pa alen di gastus ku papelada . Ana nen sempri ka tevi es dinhero disponivel, el ki ta ganha 600 euros como empregada di limpéza nun Hotel di Lisboa. Si marido ta trabadja na obra. Dia sin dia nau. Di forma ki so poku a poku é ki Ana podi considji “nacionaliza ” tudu si fidjus. Primero foi Ruben, la pa fin d’ano ê fla ma ê ta pruveita dinhero di subsidio di Natal pa ê legaliza Ivan. Mesmo si es alimenta so di spagheti ku ketchup.
PRUCESSO VICIADU
Sta en kurso na Portugal um campanha pa legaliza crianças indocumentadus di origen cabo-verdiano . Es ê milhares segundo Alto Comissariado para as Migrações (ACM) mas ti es mumento so da entrada uns 10 pedidos di nacionalizason.
Pamodi? Pamodi familias ka teni dinhero pa paga. Maioria di es crianças e fidju di imigrantis indocumentados ki teni prublema na ranja trabadju na es “mumento di crizi”. Ê um circulo viciozu : Sen documentos es ka podi trabadja, sen trabadju es ka podi ranja dinhero pa documentos ou pa da entrada a prucesu di ses fidju. fonte:ondakriolu
COMMENTS