“ N’passa mal, ka tinha nen agua nen luz na prédio, n’passa dias sen kumi, ta bai treina sen toma pequeno almosu, sen cobra nada... “
DIZABAFU DI UN JUGADOR DI ELITE...
“ N’passa mal, ka tinha nen agua nen luz na prédio, n’passa dias sen kumi, ta bai treina sen toma pequeno almosu, sen cobra nada... “ - Kel li ê un dizabafu pamodi Nelson ka ta kré papia di mumentos dificil ki ê passa na Portugal na inicio di si carrera, ê fla ma ê ta prifiri guarda na si kurason kes midjor recordason di si primeru clube na Portugal ( Vilanovense).
Na 2000, ku 19 anu di idade, Nelson Augusto Tomar Marcos dexa si equipa di Palmeiras na Sal rumu a Portugal trás di si sonho di minino: JUGA NA BENFICA.
Na principio ka foi facil: É kumesa na Vilanovense, un equipa quazi amador di Vila Nova de Gaia, na distrito di Porto. Nelson ta agradeci kondutor di equipa ki ta daba es kumida, ê ta lembra tambe di un elemento di direson ki tinha un cafetaria, e fla ma era la ê ta bai mataba fome.
SUBIDA METEÓRICA...
Apezar di tudu dificuldades Nelson ka dizisti. Na realidade Nelson dja staba habituadu ku dificuldades, el ki naci y ki kria na Dja D’Sal rodiadu di 17 irmons ( el ê + pikinoti) habituadus na luta kontra mar y bentu.
Na Vilanovense es lateral direito rapidamenti da na vista y 5 anu dipos (2005) Benfica “cumpral” na Boavista pa 1.5 milhons di euros pa substitui Miguel, un otu cabo-verdiano ki na altura sai di Benfica pa Valencia.
Nelson txiga Benfica práticamente como un “desconhecido” mas rapidamenti ê conquista si lugar y di un dia pa otu ê torna un di kes “coqueluche” di adeptos encarnadus. Pa Nelson juga na Benfica foi koncretizason di un sonho, un di kes pontu + altu di si carrera.
Na Luz ê passa 3 temporadas. Dipos di uns 100 jogos ku aguia na petu, Nelson bai aventura na Spanha, na Betis de Sevilha. Paralelamenti ê acquiri nacionalidade portuguez y pa 4 bes ê reprezenta Portugal (sempri na jogos particulares).
Nelson transfiri pa Betis di Seviha pa cerca di 6 milhons di euros. El era jugador + ben pagu di equipa, por isso kuandu kumesa ta surgi dificuldades financeiros Nelson fla ma es fazel “vida imposivel” pamodi es kria pa ê sai di kualquer jêtu.
Na Spanha ê juga inda pa Osasuna y Almeiria, ku un passagen pa Calcio di Italia, undi ê juga na Palermo ( Pa Nelson foi na Palermo ki é passa kes pior mumento di si carrera, na 2013).
6 anus dipos di ê sai di Portugal ê volta pa pontu di partida, mas dipos di un temporada na Belenenses ê regressa na es ultimo veron pa Spanha kontratadu pa Alcorcon, clube di Madrid di segunda divizon di kampionatu Spanhol.
FELIZ DA VIDA NA SI NOVO EQUIPA...
Nelson dja sta perfeitamenti adaptadu na Alcorcon y inda ê ka fadja ninhun jogo es temporada. Mas Nelson fla ma ê ka sta na es equipa so pa sta: Ê kré fazi storia, é kré djuda coloca Alcorcon na escalon maior di futebol spanhol. Habituadu ku luta y ku ultrapassa obstaculos, kel li ê + un dezafio ki Nelson sta lansa. Ku 32 anu di idade. Será ki ê ta konsigui ? fonte;OK
Comenta...
COMMENTS