Dja foi konfirmadu ma ka abridu ninhun válvula ou komporta pa liberta águ. Tambe konfirmadu ma águ ka foi “canalizadu” pa ninhun rezervatório ki nen sequer ka ezisti.
SERÁ KI BARRAGEN DI BANCA FURADA STA “FRADU” ?
Dja foi konfirmadu ma ka abridu ninhun válvula ou komporta pa liberta águ. Tambe konfirmadu ma águ ka foi “canalizadu” pa ninhun rezervatório ki nen sequer ka ezisti. Toneladas di agu també ka ta evapora di un dia pa otu. So ta resta un soluson: Agu di barragem di Banca Furada, na S.Nicolau, entra na txon. Y ê entra nun kurtu espasu di tempu, cuza ki ta indica ma ten grandis fendas ou fissuras na bacia di barragem.
POSSIVEL XPLICASON...
E ka primeru bes na mundo ki grandis quantidadi di agu s ta desapareci mesteriozamenti di un dia pa otu. Na mundu ten cazu di lagos desaparecidos ou de lagoas ki brusamenti dexa di izisti . Mas nu ten ki reconheci ma cazu di es barragen di S.Nicolau ê inedito, di facto ka ten “recorde” di ninhun otu barragen ki perdi tudu si agu di un mumentu pa otu.
Vale di Fajã, na S.Nicolau, undi labantadu es barragen ê di origen vulcanica, sima tudu ilhas di Cabo Verde. Baxu txon podi ten tuneis (tubos vulcanicos) rotxa podi ten fissuras internus ki ta ben di tempu di erupsons ki origina formason di ilhas . Ė provavelmenti através di es fissuras ou tuneis subterraneos ki agu scorri. Es agu podi bai sai na algun ladu y origina algun nascente natural sima na txeu otu rotxas di Cabo Verde ou enton si ê k’atxa fendas pa sai ê ta forma un especie di lago subtrerraneo.
FAZEDU ESTUDOS TOPOGRÁFICOS?
E klaru ki enginherus di Mota Engil ( empreza portuguez ki prujeta y konstrui barragen) e klaru ki enginehrus certamenti studa topografia di terreno y fazi pesquizas geotécnicos antis di da inicio a konstruson di obra . Mas dicididamenti algun cuza fadja pamodi barragen ka kumpri tarefa pa e ki ê foi prujetadu ( tarefa di qualquer barragem ê armazena agu).
E TEN KOMPUSTURA?
Ta dipendi . Gossi enginherus ten ki bai fazi balansu di stragu y studa forma di salva es investimento. Un método possivel di rezolvi es prublema e localiza y fitxa es fendas ku beton armadu ( ou kalda di cimentu). Si es ka konsigui ê 6.35 milhons di euros ki ta bai pa “rotxa batxu”, un montanti ki inda nen Cabo Verde ka paga pamodi financiamentu di es barragen sta incluido na kel linha di crédito di 200 milhos di euros ki Portugal abri pa CV y ki també possibilita konstruson di otus barragens na ilha di Santiago.
Barragen di Banca Furada cumesa konstruidu na 2011, mas “por prublemas varios” obra foi txeu bes suspensu ate ki ê foi konkluidu y entregue na Janero di anu passado.
Ah, ê verdadi, ten otus barragens ku erros técnicos: barragen di Salineru por exemplo pa + ki txuba ben ê ta kontinua baziu. Stranhu.
NOTA DI EDITOR : Es artigo ê ka baziadu na ninhun estudo cientifico ou parecer técnico. E so un tentativa di kompreendi kuzé ki passa ku agu di es barragen já ki ninhun “interveniente” na prucesu di si konstruson ka kré da cara pa esclarece populason. fonte:ondakriolu
COMMENTS