Cabral foi ti dia di si morte “eternamente grato” pa si mai. Mesmu auzenti Cabral sempri ta mandaba kel ajuda pa sustentu di si mai
KENHA KI ERA NHA IVA?
Nome kompletu talvez dja bu sabi, eh Iva Pinhel Évora (1893-1977).
Mas kenha ki era di facto es mudjer ki na dia 12 di Setembro di 1924 ( fazi hoje exatamenti 91 anu) pari un meninu ki anus dipos ta tornaba un di kes maior lider revolucionário di Africa?
Pa nu konta si storia nu ten ki roxa na limiti di si vida privadu, un vida di luta , di sacrificio y até di insultos sima vida di txeu mai africanas ki odja ses fidju ta larga tudu pa bai kombati colonialismo.
Iva Pinhel Evora naci na un familia di camponezis ramediadu provavelmenti na zona di S. Francisco, na ilha di Santiago , na dia 31 di Dezembro di 1893. Iva sabia lé y sabia screbi nun altura ki maioria di mininos di Cabo Verde ka ta baba scola. Iva provavelmenti completa kuarta classe.
PRIMERU IDA PA GUINÊ...
Iva tinha 29 anu kuanda eh emigra pa Guiné Bissau djuntu ku si kunpanhero ( João Carvalho Silva, funcionario di Finanças) pai di Ivo , si primeru fidju . Ivo tinha so 9 mes kuandu si mai lebal pa Guine.
Na Guine relacionamentu di Iva ku João Silva ka dura txeu. Na mesmu anu Iva conxi Juvenal Cabral, si futuro kumpanhero. Di Juvenal ( pai di Amilcar Cabral) nu ka ta papia txeu nes post , so nu ta fla ma era fidju di un familia di camponezes di Rubera di Engenho, na Ilha di Santiago. Graças a si madrinha ( Simoa dos Reis Borges, di Santa Catarina ) gracas a es si madrinha rica Juvenal tevi un bon educason académico y ku 22 anu eh bai Guine-Bissau como professor. Na altura ki eh kumesa ta relaciona ku Iva Juvenal ta viveba na Geba ku otu mudjer ( Ernestina, karregadu di fidju) enquanto Iva ta viveba na Bafatá. Foi la ki, 9 mes dipos, naci Amilcar Cabral. Juvenal regista fidju.
Juvenal entretantu ben separa di si primero kumpanhera y por volta di 1926 eh sta viveba ku Iva na Geba undi na 1927 naci gémeas Armanda ku Arminda. Mas relason entre es cazal dja ka staba mutu fixi, na es mesmu anu es separa y meninos bai batizadu na Praia. Embora eh volta pa Cabo Verde pa fika, talvez pamodi dificuldades na CV (Iva staba gravida di Antonio da Luz Cabral) talvez pamodi dificuldades eh dicidi bai otu bez pa Guine y eh fixa rezidencia na Bissau undi eh kompartilha moradia ku Juvenal y si novo familia.
Foi momentos dificil pa mai di Amilcar .Pa sovrevivi eh ta bendeba na rua produtos ki eh ta confecionaba na caza. Na 1932 Juvenal volta pa Cabo Verde pa eh bai fika djuntu ku si mudjer portugueza ( Adelina, mai di Luis Cabral). Eh leba Amilcar, Armanda y Arminda, Iva fika di es forma separadu di fidjus. Desejo di Iva era també bai pa CV mas alguén pregal un partida: es roubal kuazi tudu cuza ki eh tinha, por isso eh fika na Bissau pa eh tenta refazi si vida antis di volta pa CV.
LUTA PA KUSTÓDIA DI FIDJUS NA CV
Por volta di 1933/34 Iva dja staba na Cabo Verde, eh bai mora na Ponta Belén, na Praia. Dipos di un luta dificil eh consigui “recupera” si fidjus ki staba ta mora na Santa Catarina ku ses pai Juvenal Cabral. Juvenal ka ta kreba nen dexaba Iva odja meninos, eh ta xintaba eh ta txoraba/
Foi na Praia, ku si mai, ki Amilcar kumesa scola ( dja eh staba atrazadu) . Na 1937 Amilcar termina scola primaria ku distinson mas na Praia ka tinha Liceu pa eh kontinua studu. Nha Iva ka vacila : Eh ruma si mala y ku tudu si mininos eh bai mora na S.Vicente undi tinha unico Liceu di CV ( Liceu Gil Eanes).
VIDA DIFICIL NA MINDELO...
Es mudjer eleganti y bunita ki bu sta odja na foto eh també un lutadora, un vizionária , Cabral ka panhal na txon... Pa sobrevivi y educa si fidjus na Mindelo sen ajuda di pai, Iva ramanga brasu trabadja. Eh “desdobra” como mudjer indipendente y chefe di familia : Pa alén di trabadja na fabrica di conservas undi eh ta pagada 5 tiston por hora eh ta cozeba y eh eh ta lababa ropa pa militares ki staba na S.Vicente por altura di Segunda Guerra Mundial. Na un unico entrevista ki eh da na si vida na Jonal “ No Pintxa” di Guine Bissau Iva fla ma eh kansa di + na tina y na ferro, ta trabadja dia y noite pamodi eh ka tinha auxilio di pai di si fidjus.
Na 1944 Amilcar termina Liceu y tudu familia volta pa Praia.
IMPORTANCIA DI IVA NA VIDA Y PENSAMENTO DI AMILCAR CABRAL ...
Talvez pamodi era + culto y di certa forma konsciente di prublemas di Cabo Verde ki Juvenal Cabral sempri ta mensionadu como un di kes grandi “mentores ” di Amilcar Cabral, pelo menus na si infancia y adolescencia. Mas influencia di Nha Iva, mudjer simples y batalhadora, podi ser + di kel ki ta imaginadu na “moldagen” di caráter y pensamento politico di Amilcar Cabral.
Amilcar sempri odja si mai ta luta, ta batalha, ta difendi si interress ki era interesse di si fidjus. Amilcar até djuda ku xplicasons ki eh ta daba y dipos kuandu eh kumesa trabadja na Praia, mas certamenti pa Amilcar cabral so kel la ka ta txigaba. Cabral kria liberta tudu mai cabo-verdianu, tudu mai africanu di es fardu di xplorason y sofrimento.
GRATIDON...
Cabral foi ti dia di si morte “eternamente grato” pa si mai. Mesmu auzenti Cabral sempri ta mandaba kel ajuda pa sustentu di si mai, es poema ki pu podi le na imagen ta mostra ma Nha Iva ta staba sempri na si pensamentu. ( Poema eh dedicatoria di Amilcar Cabral kuando eh termina curso di Agronomia na Portugal)
Di facto eh ta flaba ma el sen si mai eh ka era ninguen. Amilcar Cabral odja si mai pa ultimo bez na 1959. Na dia 20 di Janero di 1973 Amilcar Cabral foi assasinadu na Guine Konakry. Nha Iva, ki sta rizidiba na Bissau, bai Konakry sisti enterro.
Iva Pinhel Evora morri na Bissau na Agosto di 1977. Inda eh tevi tempu di odja luta di si fidju ta venci, eh odja Cabo Verde y Guine Bissau ta labanta bandera di liberdadi.
( Nu ta pidi desculpa pa algun eventual "inizatidon" ki es artigu podi teni, na verdade ka ten ninhun biografia di mai di Amilcar Cabral ki podia sirbi di apoio, fonte foi artigos na jornal)
fonte:ondakriolu
COMMENTS